شاهدیئے پێتی
37
بِسَلێلا چه چِگردئے دارا پێتیے اَڈّ کرت که دْراجیا دو و نێم دَست اَت، پْراهیا یکّ و نێم دَست و بُرزیا هم یکّ و نێم دَست.
2 پێتیای چه ڈنّا و تها گۆن زَگرێن تلاها سرپۆش کرت.
گِرداگِرد تلاهئے پَٹّیے پِری کرت.
3 په پێتیا تلاهئے چار کَڑیای اَڈّ کرت و پێتیئے چارێن پادَگانی لِچّێنتنت، دو کَڑی یکّ نێمگێا و دو آ دگه نێمگا.
4 چه چِگردئے دارا دو گوَرباسکی اَڈّ کرت و گۆن تلاها سرپۆشی کرتنت.
5 په پێتیئے چست کنگا گوَرباسکی چه پێتیئے کَشئے کڑیان گوازێنتنت.
6 چه زَگرێن تلاها کَپارَتے اَڈّی کرت و پێتیای سرپۆش کرت.
دْراجیا دو و نێم دَست اَت و پْراهیا یکّ و نێم دَست.
7 تِلاهئے دو کَرّوبیای اَڈّ کرت، تلاهی زرت و ٹَپِّت و اَڈّی کرتنت.
اے کَرّوبیای سرپۆشئے دوێن سَران اَڈّ کرتنت،
8 یکّ کَرّوبیے سرپۆشئے یکّ سرێا اَڈّی کرت و آ دگه کَرّوبی دومی سرا.
سرپۆش و دوێن سرانی کَرّوبیای جتا جتا اَڈّ نکرتنت، اے یَکٹُکُّر اَتنت.
9 کَرّوبی سرپۆشئے سربرا اَتنت.
دێمِش گۆن یکدومیا اَت و چمِّش گۆن سرپۆشا.
بانزُلِش بُرزادیا پَچ اَتنت و سرپۆشِش ساهێل کرتگاَت.
ٹێبَل
10 چه چِگردئے دارا ٹێبَلے اَڈّی کرت.
دْراجیا دو دَست اَت، پْراهیا یکّ دَست و بُرزیا یکّ و نێم دَست.
11 گۆن زَگرێن تلاها سرپۆشی کرت و تلاهئے پَٹّیے اَڈّی کرت و چارێن نێمگان پِری کرت.
12 ٹێبَلئے سَربری تَهتَگا، چارێن نێمگان تلاهئے پَٹّیے پِری کرت و تَهتَگئے چێرا، چارێن نێمگان یکّ پَنجَگێئے پْراهیئے کَدّێن کابے پِری کرت.
13 په ٹێبَلا تلاهئے چار کَڑیای اَڈّ کرت و کَڑیای ٹێبَلئے چارێن کُنڈان، پادَگان پِر کرتنت.
14 اے کَڑی پمێشکا کابئے نزّیکّا اَتنت که ٹێبَلئے چِست کنگئے وهدا گوَرباسکان بدارنت.
15 ٹێبَلئے چِست کنگئے گوَرباسکی چه چِگردئے دارا اَڈّ کرت و گۆن تلاها سرپۆش کرتنت.
16 ٹێبَلئے سرئے سامانی چه زَگرێن تلاها اَڈّ کرتنت، تال و تاس و جَگ و هما کاسَگ که په رێچَگی کُربانیگئے اێر رێچگا کار بندگَ بنت.
چِراگدان
17 چِراگدانی چه زَگرێن تلاها اَڈّ کرت.
چِراگدان، چه بُنا بگر تان شاهَڑان، اِشیئے جند و پیاله و گُلبُن و پُلّی ٹَپِّت و اَڈّ کرتنت.
جتا جتا اَڈّی نکرتنت، اے یَکٹُکُّر اَتنت.
18 چه چِراگدانئے کَشان شَش شاهڑ در آتک، سئے شاهڑ چه چِراگدانئے یکّ کَشێا و سئے شاهڑ چه دومی کَشا.
19 هر شاهَڑا سئے پیاله پِر اَت، هر پیالها بادامئے پُلّئے وڑێن گُلبُن و پُلّ پِر اَت.
چِراگدانئے هر شَشێن شاهڑ همے پئیم اَتنت.
20 چِراگدانئے بُنشاها چار پیاله پِر اَت، گۆن بادامئے پُلّئے وڑێن گُلبُن و پُلّان.
21 یکّ پیالهے ائولی دوێن شاهَڑانی بُنا اَت، چه هما جاگها کَمّے جَهلتر که شاهَڑ چه بُنشاها در آتکنت، دومی پیاله دومی دوێن شاهڑانی بُنا و سئیمی پیاله سئیمی دوێن شاهڑانی بُنا اَت.
هر شَشێن شاهڑانی چێرا پیاله پِر اَت.
22 گُلبُن و شاهڑ و چِراگدان یَکٹُکُّر اَتنت.
اے سجّهێنی چه یکّێن ٹَپِّتگێن زَگرێن تلاها اَڈّ کرتنت.
23 په چِراگدانا هپت چراگی اَڈّ کرت و چِراگدانئے سَمبالگئے ائوزار و سامانی چه زَگرێن تلاها اَڈّ کرتنت.
24 په چِراگدان و اِشیئے سجّهێن سامانانی اَڈّ کنگا یکّ تالانتے* زَگرێن تِلاهی کارمرز کرت.
بۆسۆچی کُربانجاه
25 بۆسۆچی کُربانجاهی چه چِگردئے دارا اَڈّ کرت.
چارکُنڈ اَت.
دْراجیا یکّ دَست اَت، پْراهیا هم یکّ دَست و بُرزیا دو دَست.
کانٹ و کُربانجاهی هۆر اَڈّ کرتنت، اے یَکٹُکُّر اَتنت.
26 کُربانجاهئے سر و سجّهێن نێمگ و کانٹی گۆن زَگرێن تلاها سرپۆش کرتنت و چَپّ و چاگردا تلاهئے پَٹّیے پِری کرت.
27 په کُربانجاها تلاهئے دو کَڑیای اَڈّ کرت و همے پَٹّیئے چێرا پِری کرتنت.
کُربانجاهئے دوێن کَشان دو دو کَڑیای پِر کرت که چِست کنگئے وهدا گوَرباسکان بدارنت.
28 گوَرباسکی چه چِگردئے دارا اَڈّ کرتنت و گۆن تلاها سرپۆش کرتنت.
29 پِر مُشَگی پاکێن رۆگن و اَسیل* و وشبۆێن سۆچُکیای اَڈّ کرت، هما پئیما که اَترساز وشبۆ اَڈَّ کننت.